Terra da culturar abastanza per la furniziun dal pajais? Plinavant dus terzs da las terras agricolas da la pli auta qualitad sa chatta en regiuns urbanas u periurbanas.

Tenor l’art. 30 da la lescha davart la furniziun dal pajais (LVG) è il stadi federal obligà da garantir, tras mesiras da planisaziun dal territori, la mantegnida d’ina surfatscha suffizienta da FFF – sco basa da furniziun en cas da situaziuns da scarsezza severas. En il plan da fatschenta FFF (2020) vegn fixà in minimal da 438’460 hectaras. Questa surfatscha po en cas da crisa garantir la furniziun cun 2’340 kilocalorias per persuna e di per in total da 8.14 milliuns abitants – quai correspunda al stadi da la populaziun dal 2013. En l’onn 2023 cumpigliava la surfatscha da rotaziun garantida 445’680 hectaras (netto, vesai indicaziuns). Quai è 1.6 % sur il minimal prescrit. La populaziun è creschida fin ils 1 da schaner 2023 sin 8.82 milliuns persunas – 676’000 dapli che quel stadi da la populaziun che vegniva duvrà per calcular il minimal. Da las totalas FFF (476’791 hectaras brutto) sa chatta 86’293 hectaras (18 %) en regiuns urbanas, 237’143 hectaras (50 %) en regiuns periurbanas e 153’355 hectaras (32 %) en vischnancas ruralas. Las regiuns periurbanas èn regiuns che cunfineschan geograficamain cun citads e agglomeraziuns. Uschia sa chatta radund dus terzs da las terras en regiuns cun conflicts d’utilisaziun augmentads tranter svilup da l’abitadi e segirezza da l’alimentaziun.